महिलेचा झोपलेल्या अवस्थेत व्हिडीओ चित्रीत केला. त्यानंतर तिच्यावर अतिप्रसंग करण्याचा प्रयत्न केला.
कोलकाता, दि. १६ : येथील आर. जी. कर. शासकीय वैद्यकीय महाविद्यालयात प्रशिक्षणार्थी डॉक्टर तरुणीवर बलात्कार करून तिचा खून केल्याचं प्रकरण ताजं असतानाच याच शहरात आणखी एक खळबळजनक घटना घडली आहे. कोलकात्यातील दुसऱ्या एका रुग्णालयात महिलेची छेडछाड झाल्याचा प्रकार समोर आला आहे. याप्रकरणी कोलकाता पोलिसांनी एका आरोपीला अटक देखील केली आहे. पोलिसांनी या प्रकरणाची माहिती देताना सांगितलं की पीडित महिलेच्या मुलावर रुग्णालयात उपचार चालू आहेत. रात्री आई तिच्या मुलाच्या शेजारी झोपली होती. त्याचवेळी रुग्णालयातील एका वॉर्डबॉयने झोपेत असलेल्या महिलेवर अतिप्रसंग करण्याचा प्रयत्न केला. पीडितेने तिच्या तक्रारीत म्हटलं आहे की आरोपी वॉर्डबॉयने आधी त्या महिलेचा झोपलेल्या अवस्थेत व्हिडीओ चित्रीत केला. त्यानंतर तिच्यावर अतिप्रसंग करण्याचा प्रयत्न केला.
