धुळे शहर पोलिसांनी सदर ट्रक चालकाला व त्याच्या एका सहकाऱ्याला ताब्यात घेतले.
मुंबई, दि. ३० : मुंबईतल्या टीव्ही पत्रकारिता क्षेत्रात काम करणाऱ्या हर्षल भदाणे या पत्रकाराचा धुळ्यात अपघाती मृत्यू झाला. हर्षल भदाणे हे त्यांच्या बोरकुंड या गावी गेले होते. तिथून परतत असताना त्यांची कार गरताड गावाजवळ रस्त्याच्या कडेला उभी होती. त्यावेळी समोरुन आलेल्या भरधाव ट्रकने त्यांच्या कारला धडक दिली आणि कार लांबपर्यंत ओढत नेली. यावेळी हर्षल भदाणे यांनी स्वतःला वाचवण्यासाठी कारमधून उडी मारायचा प्रयत्न केला मात्र त्यावेळी ते ट्रकच्या चाकाखाली आले आणि त्यांचा जागीच मृत्यू झाला. या कारमध्ये हर्षल भदाणे यांच्यासह बसलेले आणखी दोन जण गंभीर जखमी झाले आहेत. धुळे शहर पोलिसांनी सदर ट्रक चालकाला व त्याच्या एका सहकाऱ्याला ताब्यात घेतले. हर्षल भदाणे यांनी साम मराठी, झी चोवीस तास अशा वाहिन्यांमध्ये काम केलं. सध्या ते टाइम्स नाऊमध्ये कार्यरत होते. धुळे येथे ते त्यांच्या गावी गेले होते. त्यावेळी ही घटना घडली.
