चित्रकला व शालेय विद्यार्थ्यांना लागणाऱ्या विविध प्रकारच्या साहित्य निर्मितीत असलेल्या कॅमलिन उद्योगसमूहाचे ते माजी अध्यक्ष होते.
मुंबई, दि. १५ : कॅम्लिन उद्योगसमूहाचे प्रमुख व हजारो कुटुंबाना रोजगार मिळवून देणारे मराठमोळे उद्योजक सुभाष दांडेकर यांचं आज (१५ जुलै) सकाळी सातच्या सुमारास मुंबईत निधन झालं. त्यांच्या पार्थिवावर दुपारी ३.३० वाजता दादरमधील शिवाजी पार्क स्मशानभूमीत अंत्यसंस्कार करण्यात आले. चित्रकला व शालेय विद्यार्थ्यांना लागणाऱ्या विविध प्रकारच्या साहित्य निर्मितीत असलेल्या कॅमलिन उद्योगसमूहाचे ते माजी अध्यक्ष होते. शालेय विद्यार्थ्यांना लागणारी गणितीय उपकरणे, पेन्सिल, मार्कर, शाई यांसह चित्रकार व अन्य कलाकारांना लागणारं सर्व प्रकारचं साहित्य, कार्यालयीन उत्पादनं आणि व्यावसायिक उत्पादनांची निर्मिती कॅमलिन करते. सुभाष दांडेकर यांनी अनेक वर्षे या कंपनीची धुरा वाहिली. कॅमलिन हा एक आंतरराष्ट्रीय ब्रँड म्हणून पुढं आणण्यात सुभाष दांडेकर यांचा मोठा वाटा होता. आपल्या व्यवसायाच्या माध्यमातून त्यांनी लहानांपासून थोरांपर्यंत सर्व कलाप्रेमींच्या आयुष्यात जणू रंग भरले. सुभाष दांडेकर यांनी महाराष्ट्र चेंबर ऑफ कॉमर्सचं अध्यक्षपदही भूषवलं होतं. त्यांच्या अध्यक्षपदाच्या काळात महाराष्ट्र चेंबर ऑफ कॉमर्सनं राज्यातील व्यापार व उद्योगाच्या वाढीसाठी अनेक नवे उपक्रम सुरू केले. त्यांच्या निधनानं एक हक्काचा मार्गदर्शक हरपल्याची भावना उद्योग वर्तुळात व्यक्त होत आहे.
